Жапонияда су түбіне кеткен танкер жағаға жеткізілді

АСТАНА. ҚазАқпарат - Жапонияда су түбіне кеткен 450 тонна улы сілті тиелген «Ёвамару» танкері жағаға жеткізіліп, химикаттар түсіріліп жатыр, деп хабарлады Киодо агенттігі.

Агенттіктің хабарлауынша, танкер бортында 4 адам болған, олардың барлығы құтқарылды, ешкім зардап шеккен жоқ. Жанармайдың ағуы немесе химикаттардың қоршаған ортаға түсуі секілді оқиғалар болған жоқ.

Ұзындығы 50 метрге жететін «Ёвамару» бортында натрий гидроксиді - күйдіргіш сода атауымен танымал қатты улы сілті заты болған.

Танкер Жапонияның Ямагути префектурасындағы Токуямакудамацу портында тепе-теңдікті жоғалтқаннан суға батқан. Кеме корпусының көлбеу бұрышы 22 градусты құраған, демек танкердің толық суға кету қаупі болған.