Талдықорған прокуратурасы бірқатар шетелдік сайттардың Қазақстан аумағына таралуына тыйым салмақ
«Шет елдік электрондық бұқаралық ақпарат құралдары Қазақстан Республикасының заңнамаларын өрескел бұзып отыр. Дәлірек айтқанда шетелдік интернет ресурстарында Қазақстанның кез-келген пайдаланушысы кіре алатын «онлайн-казино» сынды құмар ойындары орнатылған. Қазіргі таңда интернет сайттарындағы электрондық казино және онлайн-казино туралы сілтеме мен ақпараты бар ресурстардың жолын кесу қажеттілігі туындаған. Осыған орай Талдықорған қалалық прокуратурасы Алматы облыстық мамандандырылған ауданаралық экономикалық сотына «www.latestcasinobonuses.su» және «www.joy-kasino.com» интернет ресурстары бар шет елдік бұқаралық ақпарат құралдарының өнімін Қазақстан Республикасының барлық аумағында таратуға тиым салу туралы шағым түсірді», - делінген баспасөз баянында.
Сәйкесінше «Dead or Alive», «Jurassic Jackpot», «Elements» және тағы басқа онлайн-казино ойындары бар екі сайттың Қазақстанның барлық аумағында таратылуына тиым салу туралы сот шешімі шығарылды. «Қазақстан Республикасының «Ойын бизнесі туралы» заңының 11-ші бабына сәйкес, казино мен ойын залдары, ойын автоматтары Алматы облысының Қапшағай су қоймасы маңында және Ақмола облысының Щучинск ауданында рұқсат етілген», - дейді Талдықорған қалалық прокуратурасының аға прокуроры Нұрбол Жананов.