Мырзахметов кәсіпкерлерді толғандыратын 6 мәселені атады
Бұл туралы бүгін ҚР Үкіметі отырысында «Атамекен» ұлттық кәсіпкерлер палатасы басқармасының төрағасы Абылай Мырзахметов мәлім етті.
Ол өз сөзінде палата ішкі заңдарына сәйкес тұңғыш рет 1 жылдағы кәсіпкерліктің жағдайы, әл-ауқаты мен дамуына қатысты ұлттық баяндама әзірлегендігін атап өтті.
«Осы баяндамаға сәйкес қазіргі кәсіпкерлерді толғандырып отырған 6 мәселе туралы айтпақпын. Оның ішіндегі 4 мәселе қатты ойландырып отыр. Біріншісі, зерттеуге қатысқан 10 мыңнан астам кәсіпкердің 85 пайызы нарықтың тарылуы мәселесін көтеруде. Яғни, бұл соңғы 1 жылда орын алған мемлекет тарабынан бюджеттің ықшамдалуына, негізі экспортшы компаниялар тарабынан тапсырыстардың қысқаруына, соған орай тұтынушылардың шығындарының азаюына байланысты деп санаймыз», - деді ол.
Төраға екінші мәселе ретінде қаржы көздерінің жетіспеушілігін айтты. Сұралған кәсіпкердің әрбір 5-шісі айналымға несиенің жетіспеушілігін көлденең тартса, 40 пайызы банктен алынатын несие пайызының үлкендігіне шағымданған.
«Үшінші мәселе - кәсіпкерлердің құқықтық қорғалуы, әкімшілік кедергілер. Сұралған кәсіпкерлердің барлығы әкімшілік кедергілер мен жемқорлық мәселелерін көтерді. Төртінші мәселе бұл салық саласындағы қысымдардың артуы. Зерттеуге қатысқан кәсіпкерлердің 38 пайызы осы мәселені көтеріп отыр», - деді А.Мырзахметов.
Мұнан бөлек, оның сөзіне қарағанда, кәсіпкерлер өздеріне кедергі келтіретін жайттар ретінде адам капиталы мен инфрақұрылымдық мәселелерді көтерген.