Қазақстан азаматтары ішкі туризмге көбірек назар аудара бастады
«Биыл біз еліміздегі ішкі туризмнің және Қазақстанға келетін туристердің өскенін байқап отырмыз, сондай-ақ елімізден шет елге баратын туризмнің төмендегені тіркелді. Бұған ең алдымен әлемдік қаржылық сектордағы өзгерістер, сонымен қатар өзге де жаһандық үдерістер ықпал етті. Мәселен, Еуропада қауіпсіздікке қатысты, көші-қон бағытындағы белгілі бір мәселелер бар. Осы ретте туризм Оңтүстік Шығыс Азияға қарай жылжып келеді. Атап айтқанда, біз осы жолда тұрмыз және Қазақстанда бұл үдерісті пайдаланып, туристерді тартуға мүмкіндіктер баршылық»,-деп тоқталды ол Орталық коммуникациялар қызметінде өткен Қазақстанның ішкі туризмін дамытуға арналған дөңгелек үстелде.
Осы орайда М. Иғалиев алдағы жылы елордада өтетін ЭКСПО-2017 халықаралық көрмесін барынша ұтымды пайдалану керектігін сөз етті.
Таратылған мәліметтерге қарағанда, республиканың ЖІӨ-дегі туризмнің үлесі шамамен 0,9 пайызды құрайды (тек жатын орын және тамақтану бойынша қызмет түрлерін есептегенде). 2016 жылдың I жартыжылдығында ішкі туристер қатары 2,1 млн адамды құраған. Бұл өткен жылғы көрсеткішке қарағанда 5,8 пайызға артық. Оның ішінде 217 мың ішкі және 5 мың сырттан келген турист курорттық аймақтарға барған. Ішкі туристердің 73 пайызға жуығы (1,5 миллион адам) қонақ үй, демалыс үйі және өзге туристік базалар секілді орналасу орындарының қызметін пайдаланған.