Қарағандыда көктайғақ кесірінен көлік жүргізушісі ажал құшты
25 қазан күні Теміртау қаласына бағыт алған 26 жастағы «Приора» көлігінің жүргізушісі «ДАФАС» автоорталығы маңында жол-көлік апатына ұшарды. Алдын ала болжам бойынша, жүргізуші көктайғақта рульге ие бола алмай, қарсы қозғалыс жолағына өтіп кеткен және автобуспен соқтығысқан. Ал автобус «Пежо» көлігін соққан.
Жол-көлік апатынан үш автокөлікке де механикалық зақым келді. Оқиға орнында 26 жастағы «Приора» жүргізушісі мерт болды. Өзге зардап шегушілерге медициналық көмек көрсетілді. «Теміртау-Қарағанды» автожолындағы жол-көлік апаты фактісі бойынша ҚР ҚК 345-бабы 4-бөлімі бойынша сотқа дейінгі тергеу жұмыстары басталды, бірқатар сараптамалар тағайындалды.
Ауа райы жағдайының нашарлауына байланысты Қарағанды облыстық ІІД қызметкерлері барлық көлік құралдарының жүргізушілеріне жолда абай болуды ескертеді.