Қарағанды облысында пәтер тонап шыққан ұрылар ҚАЖ өкілдерінің қолына түсті

АСТАНА. ҚазАқпарат - Қарағанды облысының қылмыстық атқару жүйесінің қызметкерлері түн мезгілінде үй тонап шыққан ұрыларды ұстап алды, деп хабарлайды ҚазАқпарат қылмыстық атқару жүйесінің Қарағанды облыстық департаментінің баспасөз қызметіне сілтеме жасап.

«Оқиға қараңғы түнде болған. АК-159/6 мекемесінің кезекшіліктегі үш қызметкері колония аймағындағы тұрғын үй секторының өздеріне тиесілі аймағын шолып жүріп, күдікті екі адамды көріп қалады. Олар қылмыстық атқару жүйесінің қызметкерлерін көре сала олар қаша жөнелген. Дегенмен, қашқындар ұзап кете алмады. Олар қолға түскен соң жақын арадағы полиция бөлімшесіне жеткізілді»,-деп хабарлады ҚАЖ Қарағанды облысы бойынша департаментінің өкілі Есімжан Байтасов. 

«Ұсталған екеудің ұры екендіктері анықталды. Бүгін таң ата ол екеуі пәтер тонап, ұрланған заттарын жасырып жатқанда қылмыстық атқару жүйесі қызметкерлерінің назарына іліккен»,-деді ол.